شقيق نورا حطوم يبكيها بكلمات تدمي القلوب … ” الناس تزّفك بالورد و الرز من جنّة لراشيا”..
نعى الشاب ادهم حطوم شقيق الطفلة نورا حطوم التي سقطت في مجرى نهر إبراهيم، وقال عبر الفيسبوك:
“نورا حبيبة قلبي و روحي،من اول نهار الناس عم تدعيلك و الشباب انتخوا لحتى يساعدونا من كل قلب و رب و الكل كان كل الوقت عم يتطمّن و يتأكد اذا بحاجة لمساعدة و اذا عرفنا شي جديد، و الجهات الامنية المعنية اشتغلوا بكل اصرار جهوزية و تقنية.
انا و اهلي ممتنّين و عم ندعي لكل الشباب و الصبايا، الله يوفقكم و يعطيكم الف عافية على غيرتكم و حرصكم على نورا، لي هي اخت و بنت كل حدا فيكم.
محبة الناس و دعواتهم و صلاتهم و اتصالاتهم للاطمئنان كانوا بلسم لَقلقْنا و خوفنا كل الوقت؛ و اليوم من وقت ما عرفنا بالخبر و الناس تزّفك بالورد و الرز من جنّة لراشيا، زفّوكِ لي بيعرفوكِ و لي ما بيعرفوكِ حبيبي، يمكن ضحكتك و وجّك الحلو خلوكِ تفوتِ على قلوب الكل، يا قلبي انت❤️حبيبتي، بحبك على قد الصلاة و الدعوات لي من كل لبنان، على قد ما ضحكتك بتاخذ العقل و بتخلّي الشخص يبتسم من قلبه، على قد ما انتِ حلوة، يا قمر الحلوين، يا قمري انت❤️
بحبك يا ملاكي، يا حبي الباقي للابد ❤️”
